క్రీడాప్రభ 

లండన్‌, ఫిబ్రవరి 8: ఫెడరేషన్‌ కప్‌ విజేత ఇటలీ జట్టు ఖర్కీవ్‌లో యుక్రెయిన్‌ నుంచి గట్టి పోటీని ఎదుర్కొని చివరకు గెలిచి సెమీ ఫైనల్స్‌లో స్థానం సంపాదించింది. 4 1తోయుక్రెయిన్‌ను ఓడించిన ఇటలీ సెమీస్‌లో చెక్‌ రిపబ్లిక్‌తో తలపడుతుంది. మరొక సెమీఫైనల్‌లో అమెరికాను రష్యా ఢీకొంటుంది. కాగా, మాజీ ప్రపంచ నంబర్‌ వన్‌ అనా ఇవనోవిచ్‌కు ఫామ్‌ ఇంకా అందనంత దూరంలోనే ఉంటున్నది. బెల్‌గ్రేడ్‌లో సెర్బియాతో ఇవనోవిచ్‌ తన సింగిల్స్‌, డబుల్స్‌ మ్యాచ్‌లను ఓడిపోయింది. అయినప్పటికీ రష్యా జట్టు మిగిలిన మ్యాచ్‌లను కైవసం చేసుకోవడంతో 3 2తో సెర్బియాను ఓడించి సెమీస్‌కు అర్హత పొందింది. చెక్‌ జట్టు 3 2తో జర్మనీపైన, యుఎస్‌ 4 1తో ఫ్రాన్స్‌పైన గెలుపొందాయి. మొదటి రోజు యుక్రెయిన్‌తో 1 1తో సమ ఉజ్జీగా ఉన్న ఇటలీ రెండవ రోజు ప్రపంచ నంబర్‌ 12 ఫ్లావియా పెన్నెట్టా గెలుపుతో ముందంజ వేసింది. పెన్నెట్టా 7 5, 7 6తో అలోనా బొండారెంకోను ఓడించింది. ఫ్రాన్సెస్కా షియావోన్‌ 2 6, 6 1, 6 1తో కేటరీనా బొండారెంకోపై గెలిచి ఇటలీ ఆధిక్యాన్ని పెంచింది. 2008లో ఫ్రెంచ్‌ ఓపెన్‌ గెలుచుకున్నప్పటి తన ఫామ్‌ను ఇవనోవిచ్‌ ఇంకా ప్రదర్శించలేకపోతోంది. అలీసా క్లైబనోవాతో సింగిల్స్‌ పోటీలోను, జెలెనా జాన్కోవిచ్‌తో కలసి డబుల్స్‌ పోటీలోను ఇవనోవిచ్‌ కేవలం ఐదు గేములు గెలుచుకున్నది. ఇవనోవిచ్‌ ఫామ్‌ కోసం తంటాలు పడుతుండగా మరొకవైపు అమెరికన్‌ మెలానీ ఔడిన్‌ అంతకంతకూ ఆత్మవిశ్వాసాన్ని పెంచుకుంటున్నది. ఉత్తర ఫ్రాన్స్‌లోని లైవిన్‌ పట్టణంలో ఔడిన్‌ సాయంతో అమెరికా ప్రత్యర్థి ఫ్రాన్స్‌ను ఓడించింది. శనివారం యుఎస్‌కు 2 0 ఆధిక్యాన్ని సాధ్యం చేసిన 18 సంవత్సరాల ఔడిన్‌ ఆదివారం 7 6, 6 4తో జూలీ కాయిన్‌పై విజయంతో తన జట్టుకు తిరుగులేని ఆధిక్యాన్ని సంపాదించింది. కాగా, ఫెడరేషన్‌ కప్‌ సెమీఫైనల్స్‌ ఏప్రిల్‌ 24, 25 తేదీలలో జరుగుతాయి.